قومی اسمبلی تے سینیٹ دے اجلاس اڄ تھیسن، 153 نکات تے مشتمل ایجنڈا جاری

اسلام آباد۔ 3 مارچ (اے پی پی) پارلیمنٹ دے ݙوہیں ایواناں قومی اسمبلی تے سینیٹ دے اہم اجلاس اج پارلیمنٹ ہاؤس اچ تھیسن جنھاں کیتے مجموعی طور تے 153 نکات تے مشتمل وسیع ایجنڈا جاری کیتا ڳئے۔ قومی اسمبلی دا اجلاس ݙوپہر 3:00 وڄے سپیکر قومی اسمبلی دی صدارت تے سینیٹ دا اجلاس سویلے 11:30وڄے چیئرمین سینیٹ صدارت اچ شروع تھیسی۔ قومی اسمبلی اچ قانون سازی، عوامی مسائل تے پالیسی سازی بارے اہم نکات زیرِ بحث آسن، انھاں اچ ملک اچ ہک ملین توں ودھ لوکاں دے ایچ پی وی تے ہیپاٹائٹس ڈیلیٹ وائرس (ایچ ڈی وی) توں متاثر تھیوݨ دے معاملے تے وزیرِ صحت دی توجہ مبذول کرائی ویسے۔ دستور اچ ترمیم (آرٹیکل 24 تے 228)، جعلی کرنسی دی روک تھام کیتے اتھارٹی دا قیام تے وفاقی نظامتِ تعلیم دے ملازمین دے انضمام بارے بل متعارف کرائے ویسن۔ راول انٹرنیشنل یونیورسٹی، اسلام آباد کیپیٹل ٹیریٹری چیریٹیز رجسٹریشن تے موٹر وہیکلز آرڈیننس اچ ترامیم سودھے کئی بلاں دی منظوری تے غور دی تحریکاں پیش تھیسن۔ ملک بھر اچ نقصان دہ چربی دار تیل تے پابندی، تریمتیں دی فیصلہ سازی اچ شرکت، سرکاری گھراں دی میرٹ تے الاٹمنٹ تے عمارتاں دے فائر سیفٹی آڈٹ دے حوالے نال قرارداداں ایجنڈے دا حصہ ہن۔ بجلی دی لوڈ شیڈنگ، حکومت دی معاشی پالیسی تے ٹیکسلا روٹ تے الیکٹرک بساں دے شیڈول بارے بحث کیتی ویسے۔سینیٹ دے اجلاس اچ قانون سازی تے قومی اہمیت دے معاملات تے توجہ ݙتی ویسے۔ وزیرِ داخلہ نادرا آرڈیننس 2000 اچ ٻئی ترمیم دا بل پیش کریسن۔ الدانش یونیورسٹی اسلام آباد دے قیام دا بل وی منظوری کیتے پیش کیتا ویسے۔ تعلیمی اداریاں دے قیام، پی ایم ڈی سی ایکٹ اچ ترمیم تے آئین دے آرٹیکل 62، 153 تے 228 اچ ترامیم نال متعلق قائمہ کمیٹیاں دی رپورٹس ایوان اچ پیش کیتی ویسن۔ فیڈرل پبلک سروس کمیشن (ترمیم) بل تے اسلام آباد انٹرنیشنل یونیورسٹی پاکستان بل متعارف کراوݨ دی تحریکاں پیش تھیسن۔ گیس سیکٹر دے 3.2 ٹریلین روپے دے گردشی قرضے تے عالمی سطح تے پاکستان دی سرمایہ کاری دی درجہ بندی (جی آئی آر آر آئی) تے بحث، ایندے علاوہ قومی ہاکی ٹیم دے دورہ آسٹریلیا اچ انتظامی مسائل تے توجہ وی ݙوائی ویسے۔